Charli osomar aphan ingprim kipum bor-i pu alam pen Karbi Anglong angkang hurchodut

Kachethap alam chot, lake ahok kali : Chief Medical & health officer

Diphu, Vosik 1: Karbi Anglong arlo kaprek kaprek School along doctor adilung lapen raikom asaikhi atum chelangsi school along kacharli bom a osomar atum aphan ingprim kipum bor-i lapen ajahak a osomar atum ke apran kedam nang, anparta seh kelang nang heihui anta dolo pu alam kachethang plup ajoine Karbi Anglong arongsopi Diphu pen chenglok Karbi Anglong angkang atok ano anta chethangsi hur chodut lo.
Laso ajoine charli osomar api apo atum tongsekot school ahem dam rintisi methang methang asomar atum aphan chingthum, laso ahut school kasuti apor kalidet ajoine school along ajakong kedo atum pen khang dun lo seta kachethang thap alam pen kaphere ahir kangtang munak ajoine school along ajakong kedo atum penta chebohong tekangsi api apo atum methang methang asomar atum aphan che-en dam lo.
Adap porphai nerkep malom pen laso alam kangdang ahir ketanpik ajoine District Administration lapen Medical asaikam atumta manghu mangram asonsi dokok lo. Laso aphi penang an apor District Administration ahin pen Karbi Anglong a Deputy Commissioner pen laso alam ahok kali pusi pachethang thulo. Laso aphi Additional Cheif Medical & Health Officer Aparna Deka Saikia lapen District Imunization officer Durgeswar Ingti atum penta pherangke aphan phansi, ‘osomar atum aphan ingprim kipum bor-i lapen ajahak aosomar atum apran kedam pu kachethang alam ke ahok kali pusi pachethang lo.
La-an chot kali Medical asaikam pen ke lapuson immunization kipi mate ingprim kipum pu asai deng longle, jongsi konatne dokok puseta lake netum pen kali pusi chepaklar.
Rastriya Bal Swasthya Karyakram (RBSK) scheme pen osomar atum aok apran kelangbom a doctor adilung atum Rengbonghom along kaike kalangdam ver asonsi pini ta kelangdamji aphan pale lo. Seta ingprim kipum bor-i pu alam kachethang paprang det ajoine RBSK a doctor adilung atum aphan Rengbonghom School along charli osomar api-apo atum khangchek lo.
Laso ahut isi hini alam chepakengsi Manja Block PHC a doctor adilung atum chepajoksi Manja chedam jui seta kachethang alam ahir katangpik ajoine police atum penta alanglitum aphan honthe ADSP Muzafar Hussain pen alangli aphan Manja along amat khangdunsi Manja police station along karju patertok asai deng lo.
Karju patertok ahut kado kave alam chepakeng lapen ahok alam chini pamesi alangli tum aphan lo loplot lo. Non lapuson apor ahut RBSK asai kedeng katora kedoji angring kethek long ajok pini arnikangsam pen amat Karbi Anglong lapen West Karbi Anglong arlo laso asai kapadeng khangchek lo pusi DIO Durgeswar Ingti birta nangpale.
Pinpurme, Diphu-Howraghat subdivision hini angkang Diphu, Manja, Bakalia, Phuloni, Howraghat, Dokmoka, Dengaon lapen Samelangso heihui laso alam chethangsi horchot dut lo.
Lason thakthak West Karbi Anglong district Hamren Sud-divison angkang atok ano anta osomar atum aphan ingprim kipi bor-i lapen ajahak osomar atum apran kedam pu alam chethangsi hurchodut lo.
La-an chot kali Bokajan sub-division angkang Bokajan, Sarihajan, Balipathar lapen Khatkhati malom anta laso alam kangdang dam ajoine kaprek kaprek school along kacharli bom osomar api-apo atum tongsekot methang methang asomar atum aphan school ahem pen chingthum dam lo. Laso ahut ajahak kachingthum dam tong thekthe api apo atum kaphere lapen methang aosomar atum aphan kachematha ajoine mekri melang pensi school ahem along pale pen methang asomar atum aphan chingthum dam lo.