Hen-up Ahi Kebi Ajutang

Hako pen kevangbon Karbi ajutang angbong hen-up ahi kebi ta ison lo. Hen-up ahi kebi ta Karbi ajutang angbong isi kethedung akam angdeng binong. Athe hen-up ahi kebi ninghang aling bitap biphru lapuke longle. Aron kengjir pen mate hako pen kevangbon atengsi klemvek nangji. Kali lepute hen-up ahi kebi ajutang plenglim kali lapen kopine aker dokok pusi kekroi (ajutang papleng limle atum aphan teke pondet titi).

Hen-up ahi kebi nangji apor: Hen-up ahi kebi nangji achiklo lake Chiti lapen Phre achiklo si bi nangji. Hen-up ahi kebi ahut kenangji ason amung 1. Keipho 2. Tereng 3. Loru 4. Keipho ahen-up 5. Phelang 6. Phak-ok 7. Hor

Hen-up ahi kebi nithom angbong patang nangji Hen-up ahi kebi ke nithom angbong si patang vek nangji, lake lapuson helo:

1. Kechengsi arni: Rong asar pen risobasa atum kapinkhat atengsi hen-up ahi kebiji aphan asang kimpo. Hilik thedung isi tuksi keipho anujok pumphli eh parjap chom nangpo. Anujok parjap etlo pulote athaibong mate arumchak pum nerkep jintak pen rak thupo laso aphi achak-ap ta pum nerkep rak dunthu nangpo. Athaibong lapen achak-ap rak etlo pulote apum thedung ason kepho arjon pen phlaksor si akengri si asek abangke phlak phle det po. La phlak etlo pulote anujok phli angbong along jokthot si a-um pachekrakthang pen bu nangpo. Bonsettame kechengsi arni ke ibeng ansi buchot po. Kechengsi arnisi hen-up kepam-ih apum ta keipho akangteng lep thom soi si sik dang et nangpo. Aklong keden a loh aphanta laso arni amat loru alo endam pen bikok nangji. Hen-up alank kidu dunji aphanta tereng alankpong sikdang pen bikok nangpo

2. Adunthu arni: Adunthu arni abangke rong isi pinso arlo thurpaksi ingnam lut dampen hen-up chordam nangpo. Laso ari ke arjon chor petpet si vangphit nangji. Ingtuk isi ta kehek tang ke van long lelo. Hen-up arjon vansi hen-up ahi kebiji asang ahem arum along nang pangsom nangpo. Habit pen rong kevang ahut arloso atum tovar suding ta noke pen hen-up angtuk nang rot set set si nang paklo cho nangji.

3. Nithom arni: Nithom kepleng arni abangke rong isi ta thurdap prangsi hen-up ahi kebji asang along dampen aphrang arni kevantang a hen-up arjon heksi bui lepthom kaselam tang akaipum pen theng pangje po. Theng pangje bom a-um along thapbom po. A-um ta pleng lo pulote athak kibu pading dun thubompo lapen phakta thatsi aphek enchot pen areng ki pame si hen-up along jok dunthot po. Hen-up thapthei lo pulote athak loru arvo pen dip pame si athak asarnung patap chompen phelang dip nangji kalite arve kejang ahut lank lut toiji. Laso arni abangke hen-up le ong-eh chotlang pusettame ingnam damra hen-up kechor damthu puke longlelo. Kam anta patangthei lo pulote chinglu chingthi pen ajo apor ahut kesiktang ahor vanpen Hen-up ahi karcho padosi Hachak kekan ta pado po, laso ahutsi hen-up ahi ke-en aporom alunta lapuson si lun po. E mahe jangpo, E charnam chepinto, Rengra Longkipo , Charnam chepinto, Po richo si oso, E richosi oso, Ne mahum rumso,Nanglotha lomso , Rengra Longkipo, Ke charnam chepinto………

Hen-up ahi kebi along akertang 1. Hen-up ahi kebi ningkan isivet bichot longle lapen ningkan phli pardun ron ta bi longle. Ningkan kethom nangji. 2. Hen-up ahi kebi asang ahem arloso atum arlu dun longle. 3. Hen-up ahi kebi asang ahem chek, inghin, thengpi en longle. 4. Loru pen aparke akaprek aloh en longle. 5. Hen-up ahi kebi arni pen ke rong isi ta bangso aningkan ke methang kecho aphan ingnam along hen-up endam longlelo. 6. Hen-up ahi kebi inghor pharo isi chokvet enlongle, enthuji te inghor pharo abat thu nangji. 7. Hen-up kepam-ih akaibong var longle.

Hen-up ahi kachethak Arkoi kalite Thangthang achiklo lote rong isi chepangrum thu pet si hen-up ahi kachethak amei pado po. Laso ahut Longri arlo akethe keding mate Habe pinpo atum aphanta phapen arong aje pensi hen-up ahi lapen kejokdun aphak-ok ta chethak po.