karbi old song collection

HTPF kangkir, elong long ni adim lamki kedo pensi arni kethon Published December 18, 2016 | By Thekar Kaprek-kaprek adim tovar karangkha asai kedeng Diphu/Bokajan/Hamren/Dokmoka/Kheroni, Matijong 17: Karbi Anglong pen Dima Hasao inglong alongri arlo kedo Bodo akhei atum aphan ST(H) ajakong pilongle pura Hills Tribal Protection Forum (HTPF) atum ghonta 24 apharman kangkir kepha esek birta ketokbom apor ahut anke elong long ni adim alamki kedo pensi arni kethon. Lasonsi Diphu arongsopi along ahir ingtangrak soluk-sodak ave seta train station adung along kangkir kepha ajahak abangphu atum aphan pen pherangke aphan keton-kelang CRPF atum areng kapaso ajok masapso hur chodut lo. Bonta aphithi kachingvai-chingsai angbong pensi alam pangsam lo. Hithi-kulat lapen government asaihem heihui anta ingkir dunlap lapen gari kethe bus truck heihui cheleng vangve seta ihum hum ni gariso lapen bike scooter auto chelengjai. Diphu arongpi elong long ni adim tovar along kangkir kepha atum kachesong angthek chepaklangsi thengtut lapen arlong pen keteng asai klem. Birta ketok apor ahut anke akaprek soluk-sodak ave, ingsamjin pensi arni kethon. West Karbi Anglong Hamren arongsopi along ke ongdung HSDC, Congress, NGO, club lapen aning kipung cheroktok arat atum thurpaksi adap porphai 7:00 pen Hamren ahithi arlo hithi-kulat kangkir-etji aphan pachini lapen gariso kevek atum aphan ta a gari khangdunsi kangkir keso dak alamthe than pachini dun. Laso aphi Hamren angkang kangkir kepha kachekroi angthek chepaklangsi sampridang lo. Bonta longri khei kachinghon thekthe lapen kamunthi dun thekthe inut bang hini atum amethang jung jung ane chepethesi gariso kevekjai thek long pusi HSDC klembangphu atum pachini. Arnikangsam porphai 5:30 birta ketokbom apor ahut anke Hamren arongsopi arlo nahok ta soluk-sodak ave pusi birta nangpale. Lason thak thaksi Kheroni, Jengkha, Dongkamukam, Mailu, Hawaipur, Zirikindeng lapen Vothatlangso asanchom malom anta hithi-kulat lapen government asauhem heihui ingkir dunlap lapen gari-motor cheleng vangve. Bokajan arongsopi along todap adap apor pen hithi-kulat ingkir lapen gari-motor chelengle. Porphai 8 apor pen KSA, AISA, SYC, RYA kangkir kepha abangphu atum Sukhanjan along ketonthip ajok nat nat a gari-motor pacheleng longle det lo. Aphi Bokajan police lapen administration atum sai jokje kangkir kepha atum aphan court arrest nangkok lo lapen arnikangsam 4 apor an puthot I'mlothu lo. CCI ke kaike ason ingkir dunde. Dokmoka along abang ke kangkir kepha adilung atum aning kipung ajok tovar rangkhasi ihum-hum ni a gari aphan tengkheng dun. Halahai abirta kirip dunji aphan Dokmoka Press Club a meiphu pen chunbang atum aphan Mahamaya tovar kachetok along kangkir kepha keton atum a gari pasang dunsi a chabi endun det lo lapen a gari me kekaiji aphan ta kabor-I dolo. Arnivangsi mai-thai along kachethek longver Dokmuka Press Club achunbang James Millik lapen meiphu Devinson Teron pu chinidet aphi anta a garisi me kekeiji aphan kabor-i ajok Dokmuka Press Club atum ningduk chipi.